Говийн их дархан цаазат газрын “А” хэсгийн Орчны бүсийн эко-клубүүдийн 11 дэхь удаагийн чуулга уулзалт Говь-Алтай аймгийн Эрдэнэ суманд 2023 оны 9 сарын 28-наас 10 сарын 1-ны өдрүүдэд амжилттай зохион байгуулагдлаа. Тус арга хэмжээнд Говь-Алтай аймгийн Байгаль орчин аялал жуулчлалын газар, ГИДЦГ-ын А хэсгийн хамгаалалтын захиргаа, орчны бүсийн 2 аймаг (Говь-Алтай, Баянхонгор), 5 сум (Шинэжинст, Баян-Өндөр, Эрдэнэ, Цогт, Алтай)-ын удирдлага, мэргэжилтэнүүд, 7 сумын ЕБС-ийн багш сурагчид болон дэмжин ажилласан “Лондонгийн амьтан судлалын нийгэмлэг”, “Дэлхийн зөн” олон улсын байгууллага, “Монголын унаган байгалийн хүлцэл, тогтворжилтыг хангах нь” төслийн төлөөлөл нийт 120 хүн оролцлоо.   

Энэхүү чуулга уулзалт 2011 оноос тогтмол зохион байгуулагдаж байгаа бөгөөд энэ удаа орчны бүсийн удирдлага, хүүхдүүд Их говийн дахин давтагдашгүй байгалийн тогтоц, нэн ховор амьтад ялангуяа, Хавтгай хамгаалал, Говь нутгийн хот, суурин газрыг ногооруулах, “Уур амьсгалын өөрчлөлт ба хүүхэд залуучууд” олон улсын чуулга уулзалтад оролцогчдоос мэдээлэл авч, хамтаараа дурсгалын төгөл байгуулсан юм. Мөн “Цагаан хайрхан”-ны орон нутгийн тусгай хамгаалалттай газраар аялах замдаа Байгаль хамгаалах нөхөрлөл болон нутгийн малчин өрхөөр зочилж хамтын хүчээр булаг, шанд бэлчээр хамгаалж буй сайн туршлагатай танилцсан юм.