Ногоон хөгжил, биологийн олон янз байдлыг хамгаалалд хувь нэмрээ оруулж, газрын доройтлыг бууруулах, бэлчээрийн менежментийг сайжруулах чиглэлээр санаачилгатай ажиллаж байгаа "Байгальд ээлтэй" малчдын мэдээлэл, сайн туршлагаа солилцох уулзалт хэлэлцүүлэг, туршлага судлах аялал 2022 оны 10 дугаар сарын 26-28-ны өдрүүдэд Улаанбаатар хотноо болж байна.

Байгаль орчин, аялал жуулчлалын яамны Төрийн нарийн бичгийн дарга Э.Баттулга хэлэлүүлгийг нээж, төсөлд оролцогчид болон төслийн санаачлагч, хэрэгжүүлэгч нийт хамт олонд амжилт хүсээд, эх орныхоо байгаль хамгаалалд оруулж буй хувь нэмэр, санаачилгуудад талархал илэрхийлэн цаашид байгалийн нөөцөө зүй зохистой ашиглан, бэлчээрийн даацад тохирсон мал аж ахуй эрхэлж, бэлчээр, ой, нэн ховор амьтан, ургамлаа хамгаалан экосистемийн үйлчилгээг нэмэгдүүлэхэд малчдын сайн туршлагыг түгээн дэлгэрүүлж, хамтран ажиллах болно гэдгээ илэрхийллээ.