5 дугаар сарын 22. "Биологийн олон янз байдал"-ын ОУ-ын өдөр

Биологийн олон янз байдлын хамгийн чухал үнэт зүйл нь хүн төрөлхтөнд юугаар ч орлуулахгүй “экосистемийн үйлчилгээ”-г үзүүлдэгт оршдог. Нэгэнт л экоистемийн үйлчилгээ нь хүний мөнхийн хэрэгцээ учраас түүний үнэ цэнийг бууруулахгүйгээр хамгаалах, зүй зохицтойгоор ашиглах замаар хүний хэрэгцээг хангах арга замыг эрэлхийлсэн оновчтой санаачлагууд эцэсдээ байгаль орчны урт, богино хугацааны төлөвлөлт, хууль, дүрэмд тусгалаа олж хэрэгжих учиртай.

Сүүлийн хагас зуун жилд биологийн олон янз байдлын нөөц хурдацтай хомсдож байгааг эрдэмтэн, судлаачид эх дэлхий дэхь зургаа дахь сүйрлийн илэрхийлэл гэж үзэн дэлхийн бүх улс орон энэ чиглэлд шинэ арга зам, чиг хандлагыг эрэлхийлэн, өргөн цар хүрээтэй, томоохон үйл ажиллагааг нэгэн зорилго, цаг хугацаанд төлөвлөн зохион байгуулдаг боллоо.

Үүний нэг тод жишээ нь 1992 онд Рио де Жанейро хотод зохион байгуулсан “Байгаль орчин ба хөгжил” гэсэн НҮБ-ын олон улсын чуулга уулзалт дээр биологийн төрөл зүйлийн хомсдлыг дэлхий нийтээр хүлээн зөвшөөрч, “Биологийн олон янз байдлын” олон улсын конвенцийг батлан дэлхийн 160 гаруй улс орон, түүний дотор Монгол улс нэгдэн орсон явдал юм. Биологийн олон янз байдал нь дэлхий дахинаа нийгэм, эдийн засгийн тогтвортой хөгжлийн бодлогын тулгуур ойлголтын нэг болжээ.

Монгол Улсын Их Хурал 1993 онд “Биологийн олон янз байдлын тухай” конвенцийг соёрхон баталснаар Монгол улс конвенцид албан ёсоор нэгдэн орсон дэлхийн 30 дахь орон болсон юм.

эх сурвалж: www.cbt.int