Монгол орны биологийн олон янз байдалд чухал ач холбогдолтой Тарвагатайн нуруу, Бөхөн шарын нуруу, Зармангийн говь, Улаан шалын хоолойн  экосистемийн үйлчилгээний үнэ цэнийг тооцон үнэлж, зураглал гаргалаа.

Ингэснээр тухайн бүс нутгийн аймаг, сумд байгалийн нөөцийг хэмнэлттэй, үр ашигтай ашигласан, экосистемийн үйлчилгээг тэтгэсэн, хүлэмжийн хийн ялгарал болон хаягдал багатай, нийгмийн оролцоог хангаж ядуурлыг бууруулах хөгжлийн загвар буюу Ногоон хөгжлийн бодлого төлөвлөлтийг хэрэгжүүлэх суурь мэдээлэлтэй болж байна.

ENSURE төслийн санхүүжилтээр боловсруулсан экосистемийн үйлчилгээний үнэлгээ, зураглал бүхий энэхүү суурь мэдээлэлд түшиглэн Завхан аймаг орон нутгийн хөгжлийн дунд хугацааны төлөвлөлтийн баримт бичиг буюу “Завхан аймгийг 2021-2025 онд хөгжүүлэх таван жилийн үндсэн чиглэл” боловсруулсан нь бусад аймгуудад жишиг болохуйц төлөвлөлтийн шинэлэг хандлага байв.

Мөн хөгжлийн загвар гаргах систем динамик аргаар Завхан аймгийн нийгэм, эдийн засаг, байгаль орчны үзүүлэлтүүдийг цогцоор нь тусгасан “аймгийн ногоон хөгжлийн загвар” боловсруулсан нь орон нутгийн түвшинд байгалийн нөөц, даацад нийцсэн ногоон хөгжлийн зарчимд суурилсан (аялал жуулчлал, мал аж ахуйд суурилсан уул уурхайгаас ангид) бодлогын органик шийдэл, хувилбар гаргах анхны туршилтын загвар болов.

Тогтвортой хөгжлийн гурван тулгуур хүчин зүйлийн харилцан уялдаа, хамааралыг хамтад нь авч үзэх замаар ногоон хөгжлийн цөм нь болсон экосистемийн үйлчилгээг эдийн засгийн хөшүүргээр амь оруулах, эдгээр том ойлголтуудыг орон нутгийн төлөвлөлтөнд шингээх оролдлого хийж төлөвлөлтийн уламжлалт сэтгэлгээг өөрчилж буй орон нутгийн бодлого төлөвлөгч нартаа ялангуяа Завхан аймгийн Иргэдийн Төлөөлөгчдийн Хурал, Засаг дарга, Засаг Даргын Тамгын газрын хамт олонд талархал илэрхийлье.