Зармангийн говийн өргөн уудам газар нутагт байгаль хамгааллын ажиглалт, судалгааны ажил хийхдээ дуран л ашигладаг байсан Говь-Алтай аймгийн Эрдэнэ сумын Байгаль орчны хяналтын улсын байцаагч Р.Ичинхорлоогийн ажлын арга барил, чанарт энэ намраас  өөрчлөлт орж тодорхой байршилаас цаг хугацааны нарийвчлалтай,баримттай мэдээлэл цуглуулдаг болж эхэлсэн байна. Тэрээр саяхан сумынхаа “Бургасны амны ” худаг , “Цагаан хайрхан” ууланд байрлуулсан автомат хяналтын камеруудаа эргэж,  мониторинг хийгээд иржээ. Хяналтын автомат камертай болсноор сумын нутаг дэвсгэрт байгаа зэрлэг амьтдын мэдээллийн санг үүсгэж, бичиглэл бүртгэл хийх боломжтой болсон тухайгаа байгаль орчны улсын байцаагч Р.Ичинхорлоо ийнхүү ярьж байна.

“Төслийн санхүүжилтээр зэрлэг амьтдын усан хангамжийг нэмэгдүүлэх зорилгоор  манай сумын нутагт гаргасан “Бургасны амны” нарны өргүүртэй худаг болон янгир ямаа ихтэй “Цагаан хайрхан” ууланд автомат хяналтын камеруудад суурилуулан ажиглалт судалгааны ажлын бичиглэл баталгаажуулалт хийж байна. Нарны өргүүртэй худаг орчмын камерийн мэдээлэл, мөр зэргийг харахад энэ орчимд мал бэлчээрлээгүй, ус уугаагүй байгаа нь малчид зэрлэг амьтдын амьдрах орчныг сайржуулах ажлыг дэмжиж байгаагийн илэрхийлэл гэж ойлгож байна. Түүнчлэн энэ жил газрын гарц муу байгаатай холбоотой янгир ямааны тарга хүч муу байгаа нь автомат хяналтын камерын бичлэгээс харагдаж байгаа учир биотехникийн арга хэмжээ авах ажил маш чухал байна. Энэ мэтчилэн зэрлэг амьтны амьдрах орчны нөхцөл байдлыг үнэлэх,цаашид авах арга хэмжээг тодорхойлох боломжийг  нээн өгч байгаа чухал ач холбогдолтой учраас  төсөлд маш их талархаж байна” гэлээ.                                                                                                    

                                                                   

Байгаль орчны хяналтын улсын байцаагч Р.Ичинхорлоо

Монгол орны нэн ховор амьтныг хамгаалах, хулгайн анд өртөх байдлыг бууруулахад дэмжлэг үзүүлэх зорилгоор төслийн бүс нутгийн байгаль хамгаалагч нарыг байгаль хамгааллын шаардлагатай тоног төхөөрөмжөөр хангаж хамтран ажиллаж байгаа нь энэ.  

Тарвага, хүдэр сэргээн нутагшуулах зэрэг төслийн санхүүгийн дэмжлэгтэйгээр хэрэгжүүлж буй байгаль хамгааллын зорилтот үйл ажиллагаа болон  бүс нутаг, сумдад байгаль хамгааллын мониторинг хийх ажилд эдгээр тоног төхөөрөмжийг ашиглаж байна.