Ойг арчилж,гэрэлжүүлэх аргазүйг нутгийн иргэдэд зааж сургалаа
Орон нутгийн тусгай хамгаалалттай газар нутаг Бөхөн шарын нуруунд ойн арчилгааны гэрэлжүүлэх ажлын үзүүлэх сургалтыг зохион байгуулж, Бөхөн шарун нуруунд хамрагдах Архангай аймгийн Батцэнгэл, Хайрхан, Өлзийт, Эрдэнэмандал сумдын ойн нөхөрлөлийн гишүүдийн төлөөлөл оролцлоо. Архангай аймгийн Хайрхан сумын нутаг Салхитын аманд болсон тус сургалтад эдгээр сумдын 37 хүн оролцлоо.
Арчилгааны гэрэлжүүлэх ажлын дүнд ойн бүтэц, бүрэлдэхүүн сайжирч, ойн нөөц нэмэгдэхийн зэрэгцээ түймэр гарах, хөнөөлт шавьж тархах, өвчин үүсэх нөхцөл багасч, уур амьсгалын өөрчлөлтөд тэсвэртэй ой үүсэн бүрэлдэх боломжийг бий болгох юм.
Төсөл Тарвагатай болон Бөхөн шарын нурууны сэрүүн бүсийн 15 ойн нөхөрлөлийн тогтвортой менежментийн төлөвлөгөөг боловсруулж байгаа бөгөөд тус төлөвлөгөөг хэрэгжүүлэх ойн нөхөрлөлийн гишүүдийг чадавхижуулах ажил ийнхүү эхэлж байна.
