Төслийн бүс нутагт хийсэн хар сүүлтийн тоо толгой, нөөцийн үнэлгээгээр Улаан шалын хоолойд 1000 га-д 0,46 толгой ногдох нягтшилтай 190 орчим толгой харин Зармангийн говийн нийт тархац нутагт 1000 га-д 0,97 толгой ногдох нягтшилтай 1350 орчим толгой хар сүүлтий байх боломжтой гэсэн үзүүлэлт гарсан бөгөөд тоо толгой нь цөөрсөөр байна гэж судалгааны тайланд онцолсон байна. Тиймээс  Улаан шалын хоолойн баруун хэсэгт, Зармангийн говийн тархцын талбайн зүүн хэсэгт зэрлэг амьтанд зориулсан нарны өргүүртэй худаг гаргах, хөв барих ажлыг зохион байгуулах шаардлагатай гэж үзсэн. 

Үүний дагуу Говь-Алтай аймгийн Эрдэнэ сумын Сангийн далай багийн нутагт орших “Бургасны амны худаг” гэдэг хуучин гүн өрмийн худгийн цооногийг сэргээн нарны өргүүр байрлуулан ашиглахаар цооногийн хэмжилт, шавхалтыг хийж, ундаргыг тогтоолголоо. Энэ цооногийг амьтан ундаалах зориулалттай нарны өргүүртэй худаг болгон тохижуулахад шаардлагатай тоног төхөөрөмжийг  худалдан авах ажлыг төсөл санхүүжүүлэн зохион байгуулж байна. Нарны өргүүртэй худаг энэ оны 7 дугаар сараас ашиглаж эхлэнэ.

Монгол орны говь цөлийн бүсийн янз бүрийн байршил нутагт улирал,цаг уурын аясаар байршлаа сэлгэн нутагладаг  хар сүүлт нь  ховордож байгаа амьтан учраас агнахыг хуулиар хориглож улаан номонд оруулсан байдаг. Энэ амьтан ус бага хэрэглэдэг боловч малын тоо толгойноос шалтгаалан баян бүрд задгай усны өрсөлдөөн бий болж, бэлчээрийн хомсдолд орсноос болж ховорджээ. Хар сүүлтийг хамгаалахын тулд  амьдрах орчныг сэргээх түүний дотор усан хангамжийг сайжруулах нь чухал гэж үздэг.