Монгол орны нэн ховор,ховор амьтдыг хамгаалах үүрэг хүлээж ажилладаг  байгаль хамгаалагч нар шаардлагатай багаж хэрэгслээр хангагдаж чадаагүй , ажил үүргээ мэдрэмжээрээ л гүйцэтгэж байна гэж орон нутгийн удирдлагууд хэлж байна.  Тийм учраас Биологийн олон янз байдалд болон хүрээлэн буй орчинд үнэлж баршгүй ач холбогдолтой Монгол орны нэн ховор амьтан Цоохор ирвэс, Хар сүүлт, Аргаль, Халиун буга, Баданга хүдрийг  хамгаалах, хулгайн анд өртөх байдлыг бууруулахад дэмжлэг үзүүлэх зорилгоор төслийн бүс нутгийн байгаль хамгаалагч нарт байгаль хамгааллын тоног төхөөрөмж хүлээлгэн өглөө.

Зэрлэг амьтны хамгааллын мониторингд зориулсан автомат камер, зай хэмжигч,  байршил тогтоогч GPS, дуран зэрэг тоног төхөөрөмжийг БОАЖЯ, НҮБХХ-ийн хамтран хэрэгжүүлж буй Монголын унаган байгалийн хүлцэл тогтворжилтыг хангах нь төслийн 4 аймгийн 13 сумын байгаль хамгаалагч нарт олгож байна. Байгаль хамгааллыг  нутгийн иргэдэд түшиглэн зохион байгуулах нь  илүү  үр дүнтэй байдаг гэж байгаль хамгаалагч нар болон орон нутгийн удирдлагууд   хэлж байна. Тиймээс зэрлэг амьтны хамгааллын мониторинг судалгаандаа  ашиглах тоног төхөөрөмжийг тухайн орон нутгийн Байгалийн нөөцийн хамтын менежментийн  нөхөрлөл,  малчидын бүлэгт  ч мөн өгөх юм.