Эх байгальдаа ээлтэй хандахыг Говь-Алтай аймгийн сумдын малчид уриалж байна.
Газрын доройтлыг бууруулж цөлжилтөөс хамгаалах хамгийн чухал, үр дүнтэй арга хэмжээнүүдийн нэг нь бэлчээрийг зүй зохистой ашиглах явдал гэж үзэж аймаг сумдууд малчидтайгаа хамтран “Бэлчээр хариуцлагажуулах журам” боловсруулан батлан хэрэгжүүлж эхлээд байна.
Говь-Алтай аймгийн Цогт, Чандмань, Эрдэнэ сумд 2019 онд “Бэлчээр хариуцлагажуулах журам” баталж, малчид бэлчээрээ хамгаалахад өөрсдөө хөрөнгө оруулан бэлчээр хамгаалах дундын сан бүрдүүлэн ажиллах боломжтой болжээ.
2020 оны 1 дүгээр сард дээрх сумд “Эх байгальдаа ээлтэй хандацгаая” сумын малчидын нэгдсэн зөвөлгөөн зохион байгуулан баталсан журмаа малчиддаа танилцуулан цаашид хэрхэн хэрэгжүүлэх талаар санал солилцсон байна.
Бэлчээрийн даацад тохирсон МАА эрхлэн, байгаль эх дэлхийгээ хамгаалах нь чухал байгааг онцолж “Бэлчээр хариуцлагажуулах журам”-ыг бэлчээрийн зохистой менежменттэй хослуулан хэрэгжүүлэх нь чухал байгааг зөвөлгөөнд оролцсон малчид уриаллаа.
“Монголын унаган байгалийн хүлцэл, тогтворжилтыг хангах нь” төслийн хамтран зохион байгуулсан тус зөвөлгөөнд Говь-Алтай аймгийн 3 сумын 674 (эрэгтэй 390, эмэгтэй 284) малчин оролцлоо.
Төсөл эдгээр сумдын “Нутаг дэвсгэрт суурилсан хөгжлийн төлөвлөгөө-г боловсруулахад мөн санхүүгийн дэмжлэг үзүүлэн гүйцэтгэх зөвлөх байгууллага ажиллуулж байгаа бөгөөд тус төлөвлөгөөний төсөлд зөвөлгөөний үеэр малчдаас санал авлаа.
