Монгол орны хөхтөн судлалын нийгэмлэг (МОХСН) нь 2017 онд Монгол орны хөхтөн амьтны биологи ба экологийн судалгаа ба хамгааллын чиглэлээр үйл ажиллагаа явуулах зорилгоор байгуулагдсан. Үндэсний болон олон улсын байгууллагуудтай хамтран Монгол орны хөхтөн судлалын эрдэм шинжилгээний экспедици зохион байгуулах, нэн ховор болон ховор амьтныг хамгаалах, нутагшуулах, хөхтөн амьтны талаарх танин мэдэхүйн мэдлэгийг олон нийтэд түгээх, сурталчилах зэрэг ажлын хийж байна. Тус нийгэмлэг нь монгол орны хөхтөн судлалын чиглэлээр үйл ажиллагаа явуулдаг их, дээд сургуул, хүрээнгийн судлаач нараас бүрдсэн 20 гаруй гишүүнтэй.

Төслийн хүрээнд гүйцэтгэх ажлын нэр: Зорилтод бүс нутгийн шалгуур 6 зүйлийн популяцийн үнэлгээ хийх

Хамрах хүрээ, газар нутаг: Төслийн зорилтод бүс нутаг болох Завхан аймгийн Тосонцэнгэл, Их уул сумын нутагт хамаарах Тарвагатайн нуруу, Архангай аймгийн Батцэнгэл, Өлзийт, Хайрхан, Эрдэнэмандал сумын нутаг  хамаарах Бөхөн шарын нуруу, Говь-Алтай аймгийн Чандмань сум, Баянхонгор аймгийн Баацагаан, Баянцагаан сумын нутагт Улаан шалын хоолой, Говь-Алтай аймгийн Цогт, Эрдэнэ, Баянхонгор аймгийн Баян-Өндөр, Шинэжинст сумдын нутагт Зармангийн говийн бүс нутаг тус тус хамаарна.     

Хэрэгжүүлэх хугацаа: 2019 оны 10 дугаар сарын 31-ээс 2020 оны 5 дугаар сарын 1-н хүртэл

Хэрэгжүүлэх үйл ажиллагаа:

• Зорилтод 4 бүс нутгийн 6 шалгуур зүйлийн популяцийн үнэлгээ хийх
• Улаан шалын хоолой болон Зармангийн говьд зэрлэг амьтанд тохиромжтой хөв, цөөрөм байгуулах тохиромжтой газар нутгийн судалгаа, зөвлөмж боловсруулах,
• Зэрлэг амьтны хууль бус агнуурыг бууруулах чиглэлээр олон нийтэд сургалт зохион байгуулах,
• Зэрлэг амьтны мониторинг ба үнэлгээний судалгаанд хэрэглэх багаж, хэрэгслийн ашиглалтын сургалт зохион байгуулах

 

Зөвлөх ажлаас хүлээгдэж буй үр дүн:

• Зорилтод 4 бүс нутгийн шалгуур 6 зүйлийн популяцийн үнэлгээг хийсэн байна.
• Говийн бүсэд зэрлэг амьтанд зориулсан хөв, цөөрөм байгуулах тохиромжтой газар нутгийг сонгосон байна.
• Хүдэр сэргээн нутагшуулах тохиромжтой амьдрах орчны судалгаа хийсэн байна.
• Зэрлэг амьтны мониторинг ба популяцийн үнэлгээний судалгаанд түгээмэл ашиглах багаж, хэрэгслийн ашиглалт, тохиргоо хийж судалгаанд ашиглахад бэлэн болгож хүлээлгэж өгнө.
• Хууль бус агнуур тодорхой мэдэгдэхүйц буурсан байна.