Бодлого судлалын төв нь Монгол улсад анхлан байгуулагдсан төрийн бус судалгааны байгууллага юм. Тус төв нь 1999 онд байгуулагдсанаас хойш хөдөөгийн хөгжил, хөдөө аж ахуй, газар, бэлчээр, эрсдэлийн менежмент, зах зээл, өртгийн сүлжээ, малчдын бүлэг, хоршилт, хөдөөгийн ядуурал, нийгмийн асуудал, байгалийн нөөцийн болон байгаль орчны менежментийн чиглэлээр бодлогын судалгаа явуулах, хөгжлийн төсөл, хөтөлбөр боловсруулж, хэрэгжүүлэх талаар нэн баялаг туршлага хуримтлуулсан чадварлаг нэр хүндтэй байгууллага болоод байна. Бодлого судлалын төв нь орон тооны 6 зөвлөх, гэрээт 50 гаруй зөвлөхтэйгөөр үйл ажиллагаа явуулж байна.

Төслийн хүрээнд гүйцэтгэх ажил: “Бэлчээрийн тогтвортой менежмент”

Хамрах хүрээ, газар нутаг: Төслийн  4 аймгийн 13 суманд

Хэрэгжүүлэх хугацаа:  “Бэлчээрийн тогтвортой менежмент” гэрээт ажлыг 2019 оны 9-р сараас эхлэн 3 жилийн хугацаанд хэрэгжүүлнэ.

Зөвлөх багийн хэрэгжүүлэх үйл ажиллагаа

Чадавхжуулах. Малчдад зориулж бэлчээрийн менежментийн үйл ажиллагааны зорилго, хүлээгдэж буй үр дүн, үүнээс ашиг хүртэх боломжийн талаар танилцуулах нүүр тулсан сургалт явуулна. Төслийн зорилгыг хүлээн зөвшөөрч хамтран ажиллах сонирхолтой малчдыг сонгож, чадавхжуулах нарийвчилсан үйл ажиллагаанд хамруулна. Түүнчлэн орон нутгийн холбогдох байгууллага, албан тушаалтнуудыг бэлчээрийн менежментийн чадавхжуулах сургалтад хамруулна.

Бэлчээр ашиглалтын гэрээ. Бэлчээрийн даацад нийцүүлэн малын тоог жилд 4-6 хувиар бууруулах үүрэг хүлээж төсөлтэй хамтран ажиллах малчдын бүлэгтэй сумын Засаг дарга гэрээ байгуулна. Гэрээ байгуулах  малчдын бүлгийг дэмжиж, сургаж чадавхжуулна. 

Бэлчээр, эрсдэл, байгаль хамгаалах ажлын санхүүжилт. Бэлчээр болон биологийн олон янз байдлын амьдрах орчныг сэргээн хамгаалах үйл ажиллагааг малчдын оролцоотойгоор санхүүжүүлэх арга замыг туршина.

Орлого нэмэгдүүлэх, амьжиргаа дээшлүүлэх. Төслийн бэлчээрийн менежментийн үйл ажиллагаанд хамрагдсан малчдыг төслөөс зохион байгуулах орлого нэмэгдүүлэх, амьжиргаа дээшлүүлэх бусад үйл ажиллагаанд  хамруулна.

Зөвлөх ажлаас хүлээгдэж буй үр дүн:

• Талхлагдсан 300,000 га талбайд үзүүлэх ачаалал багассан байна.
• Малын тоо толгойг тодорхой хувиар буулгасан байна.
• Ургамлын зүйлийн бүрдэлд эерэг өөрчлөлт орсон байна.
• Малчдын орлого нэмэгдэж, амьжиргаа дээшилсэн байна.