2020 оны 10-р сарын байдлаар 13 суманд 1306 малчин өрх, 609 мянган га бэлчээрийг хамарсан 228 бүлэг төслийн бэлчээрийн менежментийн үйл ажиллагаанд сайн дураар хамрагдаад байна. Эдгээр бүлгүүд сумын Засаг даргатай бэлчээр ашиглалтын гэрээ байгуулан түүнд заасан малын тоог бэлчээрийн даацад нийцүүлэх үүргээ хэрэгжүүлэх, орон нутгийн биологийн  олон янз байдлыг хамгаалах зорилт бүхий 5-жилийн цогц төлөвлөгөө боловсруулж хэрэгжүүлэхээр ажиллаж байна.

Тус төлөвлөгөөний дагуу гэрээ байгуулсан малчид бэлчээрийн даацад нийцүүлэн малын тоог жилд 4-6 хувиар бууруулах үүрэг хүлээж байна. Үүний зэрэгцээ малыг хонин толгойн тоогоор тооцон тодорхой хандив (1 хонин толгойд 500 төгрөг) цуглуулж, түүнийг эргүүлээд бэлчээр, МАА-н эрсдэлийн менежмент, бэлчээр болон биологийн олон янз байдлын амьдрах орчныг сэргээн
хамгаалах үйл ажиллагаанд зарцуулах туршилтад гэрээ байгуулсан малчид сайн дураар хамрагдаж эхлээд байна.