Байгальд ээлтэй үйлдвэрлэл эрхэлж, орлогоо нэмэгдүүлэх арга замыг дэмжинэ.

Мал аж ахуй болон байгалийн баялгаас өрхийн орлого нь ихээхэн хамааралтай байдаг малчдын амьжиргааны эх үүсвэрийг тогтвортой, найдвартай болгож, хамаарлыг бууруулахын тулд мал сүргийн тоо толгойноос илүүтэйгээр чанарыг сайжруулах, малчин өрхийн амьжиргааны эх үүсвэрийг төрөлжүүлэх нь оновчтой шийдэл гэж үзэж байгаа юм.

Төслийн бүс нутагт цагаан идээ, ноос ноолууран бүтээгдэхүүн мөн малын гаралтай бус бүтээгдэхүүн жишээ нь ойн дагалдах бүтээгдэхүүн болон эко аялал жуулчлалд суурилан өрхийн амьжиргааг дээшлүүлэх боломж байгаа юм.

Тиймээс “Монголын унаган байгалийн хүлцэл, тогтворжилтыг хангах нь-ENSURE” төсөл төслийн бүс нутгийн сумдын Байгалийн нөөцийн хамтын менежментийн нөхөрлөл зэрэг олон нийтэд суурилсан одоо байгаа болон шинээр байгуулагдах байгууллагуудад сургалт, мэргэжлийн туслалцаа үзүүлэх, туршлага судлуулах, тэдгээрийн боловсруулсан бүтээгдэхүүний чанарыг сайжруулах, нэмүү өртөг шингэсэн бүтээгдэхүүн үйлдвэрлэхэд нь дэмжлэг үзүүлэн ажиллана.

БОАЖЯ-наас зохион байгуулж буй “Экологид ээлтэй бүтээгдэхүүн-2019” үзэсгэлэн худалдаанд төслийн сумдын нөхөрлөл хоршоодын 30 төлөөлөгчийг оролцуулан бүтээгдэхүүнээ борлуулах, бусдаасаа туршлага судлах боломжийг төсөл олгож хамтран ажиллаж байна.

Улаанбаатар хотноо 2019 оны 11 дүгээр сарын 29 нээс эхэлсэн тус үзэсгэлэнд төслийн зорилтот аймаг болох Архангай, Баянхонгор, Говь-Алтай, Завхан аймгийн 13 сумаас оролцож МАА-н гаралтай бүтээгдэхүүн, сүү цагаан идээ, ойн дагалт баялагаар хийсэн бүтээгдэхүүнээ борлуулж байна.

Малчдын нөхөрлөл хоршоог дэмжиж худалдан авалт хийхийг уриалж байна.

Эх байгальдаа ээлтэй хандацгаая.